დედოფლისწყაროს მუნიციპალიტეტში, ზამთრის საძოვარზე არსებულ ფერმაში ცოფით ძაღლის დაავადების შემთხვევა დაფიქსირდა
ლაბორატორიული კვლევის შედეგად, ცოფით ძაღლის დაავადების შემთხვევა 20 მაისს დადასტურდა. ასევე დადგინდა, რომ ინფიცირების წყარო მგელია. სურსათის ეროვნული სააგენტო დაავადების კერაში საკარანტინო ღონისძიებებს ახორციელებს, რაც სავალდებულო ვაქცინაციას, ცხოველების გადაადგილების შეზღუდვას, დეზინფექციას და ცხოველებზე ვეტერინარულ ზედამხედველობას გულისხმობს. შემთხვევის შესახებ ეცნობა ჯანდაცვის შესაბამის უწყებებს. ცოფი საშიში ზოონოზური დაავადებაა, რომლითაც ავადდება როგორც შინაური და გარეული ცხოველი, ასევე ადამიანი. ინფექცია ვრცელდება დაავადებულ ცხოველთან კონტაქტით (დაკბენა, დაკაწვრა). კლინიკური ნიშნების გამოვლენის შემდეგ, დაავადება ლეტალობით სრულდება. ცხოველებში ცოფის პრევენცია შესაძლებელია ვაქცინაციით. სურსათის ეროვნული სააგენტო ყოველწლიურად ატარებს უფასო ვაქცინაციას ცოფის საწინააღმდეგოდ და 300 ათასამდე ცხოველს ცრის.სააგენტო მოუწოდებს მოსახლეობას, დროულად ჩაუტარონ საკუთარ შინაურ ცხოველებს (ძაღლი, კატა) ვაქცინაცია, რათა თავიდან აიცილონ ცხოველების ცოფით დაავადება და საფრთხე არ შეუქმნან საკუთარ სიცოცხლეს.
იხილეთ სრულადდასავლეთ საქართველოში აზიური ფაროსანას მონიტორინგი და სპეციალური სადგურების დამონტაჟება მიმდინარეობს
აზიურ ფაროსანასთან ბრძოლის სახელმწიფო პროგრამის ფარგლებში, დასავლეთ საქართველოს ყველა ადმინისტრაციულ ერთეულში მავნებლის საწინააღმდეგო სპეციალური სადგურების და მონიტორინგის სისტემების დამონტაჟების სამუშაოები ტარდება.ფაროსანასთან ბრძოლის საკოორდინაციო მართვის ცენტრის სპეციალისტები, უკვე განთავსებული ხაფანგების მეშვეობით ახორციელებენ მავნებლის რაოდენობის და არეალის დადგენას. მიღებული შედეგების ანალიზის საფუძველზე იგეგმება კონტროლის ღონისძიებები.„მოიზიდე და გაანადგურე“ სადგურების განთავსებასთან ერთად ტარდება წერტილოვანი შეწამვლა ცივი შესხურების მეთოდით. აღსანიშნავია, რომ ფუტკრის დაზიანების თავიდან აცილების მიზნით, სადგურები არაყვავილოვან მცენარეებზე მონტაჟდება.ფაროსანასთან ბრძოლის ღონისძიებებში ჩართული არიან ადგილობრივი თვითმმართველობების წარმომადგენლები. საკოორდინაციო მართვის ცენტრში, მოსახლეობის ინფორმირების მიზნით, ფუნქციონირებს სატელეფონო გზავნილების სისტემა. ღონისძიებების შესახებ დეტალური ინფორმაცია ხელმისაწვდომია ვებგვერდზე parosana.ge.
იხილეთ სრულად12 მაისი მცენარეთა სიჯანსაღის საერთაშორისო დღეა მცენარეების დაცვით ჩვენ ვიცავთ სიცოცხლეს!
მცენარეთა სიჯანსაღის საერთაშორისო დღე, გაეროს სოფლის მეურნეობის და სურსათის ორგანიზაციის (FAO) ინიციატივით, 12 მაისს აღინიშნება. ამ დღის აღნიშვნის 2025 წლის თემაა: ჯანსაღი მცენარე - ერთიანი ჯანდაცვის უმნიშვნელოვანესი რგოლი. „სასოფლო-სამეურნეო კულტურების 40 პროცენტს მცენარეთა მავნებლები აზიანებენ, რაც აფერხებს სურსათის უსაფრთხოების უზრუნველყოფას, აზიანებს ბიომრავალფეროვნებას, გავლენას ახდენს ეკონომიკის განვითარებასა და საარსებო წყაროებზე. მავნებლების გავრცელების პრევენციის და მართვის პროცესში პესტიციდები უმნიშვნელოვანეს როლს თამაშობს. თუმცა, მათი გადაჭარბებული გამოყენება და ცუდი მართვა კვლავაც გლობალურ გამოწვევად რჩება, რადგან აზიანებს ბიომრავალფეროვნებას და საფრთხეს უქმნის გარემოს სიჯანსაღეს. მცენარეები სიცოცხლის წყაროა - ჩვენი საკვების 80 და ჟანგბადის 98 პროცენტს სწორედ მცენარეებისგან ვიღებთ. მცენარეთა სიჯანსაღის საერთაშორისო დღის მიზანია ცნობიერების ამაღლება და ყველა რგოლის ჩართულობა ჯანსაღის გარემოს შენარჩუნებაში“, - აღნიშნულია გაეროს სოფლის მეურნეობის და სურსათის ორგანიზაციის (FAO) მიერ გავრცელებულ განცხადებაში. გარემოს დაცვისა და სოფლის მეურნეობის სამინისტროს სურსათის ეროვნული სააგენტო უერთდება და სრულად იზიარებს ორგანიზაციის გზავნილებს. მცენარეთა სიჯანსაღის და სურსათის უვნებლობის უზრუნველყოფის მიზნით, სურსათის ეროვნული სააგენტოს პრიორიტეტია ფერმერების ცნობიერების ამაღლება პესტიციდების სწორად და ზომიერად გამოყენებასთან დაკავშირებით. საქართველოში რეგისტრირებულია და გამოიყენება ევროკავშირსა და ეკონომიკური თანამშრომლობისა და განვითარების ორგანიზაციის (OECD) ქვეყნებში დაშვებული პესტიციდები. პესტიციდების ხარისხის კონტროლის მიზნით, ყოველწლიურად მოწმდება ქვეყანაში არსებული 600-მდე სპეციალიზებული ობიექტი. 2025 წელს შემოწმდა 231 ობიექტი; გამოვლენილი დარღვევბის გამო, 23 ობიექტი დაჯარიმდა; სურსათის უვნებლობის სახელმწიფო პროგრამის მონიტორინგის ფარგლებში, სურსათში პესტიციდების ნარჩენების გამოვლენის მიზნით, ყოველწლიურად, 400- მდე ნიმუშის გამოკვლევა ხდება; მიმდინარე წელს უკვე გამოკვლეულია 113 ნიმუში. აღსანიშნავია, რომ ბოლო წლებში, გამოკვლეულ ნიმუშებში, სურსათში პესტიციდების ნარჩენების დადგენილ ნორმებთან შეუსაბამობა არ ფიქსირდება.
იხილეთ სრულადსურსათის ეროვნულმა სააგენტომ ვეტერინართა პროფესიული დღე მასშტაბური კონფერენციით აღნიშნა
გარემოს დაცვისა და სოფლის მეურნეობის მინისტრის მოადგილე კახა კაკაბაძემ ვეტერინარებს პროფესიული დღე მიულოცა და ხაზი გაუსვა მათ წვლილს ქვეყნის ეპიზოოტიური კეთილსაიმედოობის უზრუნველყოფაში. „ვეტერინარები ცხოველების დროული ვაქცინაციითა და მათ ჯანმრთელობაზე ზედამხედველობით უზრუნველყოფენ მომხმარებელს უვნებელი სურსათით და, შესაბამისად, იცავენ ადამიანების ჯანმრთელობას. ვეტერინარიის როლი უმნიშვნელოვანესია როგორც სოფლის მეურნეობის მდგრადი განვითარების, ასევე სასურსათო უსაფრთხოებისთვის“, - აღნიშნა კახა კაკაბაძემ. სურსათის ეროვნული სააგენტოს უფროსმა ზურაბ ჩეკურაშვილმა მადლობა გადაუხადა ვეტერინარებს გაწეული შრომისთვის და აღნიშნა, რომ მათი საქმიანობის ინდიკატორი ზოონოზური დაავადებების ბოლოდროინდელი სტატისტიკაა.„შემცირებულია ცოფისა და ჯილეხის შემთხვევები. 2023 წელს გამოვლინდა ცოფით დაავადების 85 შემთხვევა, 2024 წელს - 26. მიმდინარე წლის ოთხი თვის მონაცემებით, გამოვლენილია 2 ფაქტი, რაც გაცილებით ნაკლებია ამავე პერიოდის შარშანდელ მონაცემებთან. დაავადება „თურქულის“ კონტროლის ევროპული კომისიის გადაწყვეტილებით, გადავედით თურქულთან ბრძოლის მე-3 საფეხურზე, რაც იმას ნიშნავს, რომ ცხოველთა რეგულარული ვაქცინაციის შედეგად საქართველო კეთილსაიმედო ქვეყნების ჩამონათვალში ჩაეწერა“, - აღნიშნა ზურაბ ჩეკურაშვილმა. ღონისძიებას ცხოველთა ჯანმრთელობის დაცვის მსოფლიო ორგანიზაციის (WOAH) ევროპის რეგიონული წარმომადგენელი ბუდიმირ პლავსიჩი, ასევე აზერბაიჯანის და სომხეთის შესაბამისი უწყებების წარმომადგენლები ესწრებოდნენ. კონფერენციაზე ხაზი გაესვა ქვეყნებს შორის მჭიდრო თანამშრომლობის მნიშვნელობას, რაც ხელს უწყობს რეგიონში ეპიზოოტიური კეთილსაიმედოობის უზრუნველყოფას და რაშიც დიდი წვლილი სწორედ საქართველოს ვეტერინარულ სამსახურს მიუძღვის.ქართველ ვეტერინარებს პროფესიული დღე მიულოცა ვეტერინარიის მსოფლიო ასოციაციის (WVA) პრეზიდენტმა ჯონ დი იანმაც. „ვეტერინარიის მსოფლიო დღის წლევანდელი გზავნილია „ცხოველთა ჯანმრთელობას უზრუნველყოფს გუნდი’”, რაც აერთიანებს ვეტერინარებს, პარაპროფესიონალებს, სამთავრობო უწყებების, მარეგულირებელი ორგანოების წარმომადგენლებს და ფართო საზოგადოებას, რომლებიც ძალისხმევას არ იშურებენ როგორც ცხოველების, ისე ადამიანების ჯანმრთელობისა და კეთილდღეობის უზრუნველსაყოფად. ამ კუთხით ვეტერინარების წვლილი ფასდაუდებელია“, -აღნიშნა ვეტერინარიის მსოფლიო ასოციაციის (WVA) პრეზიდენტმა ვიდეომილოცვაში.კონფერენციის მონაწილეებმა 2025 წლის პრიორიტეტული მიმართულებები განიხილეს და ახალ რეგულაციაზე იმსჯელეს, რომლის მიხედვითაც 2026 წლის პირველი იანვრიდან ვეტერინარების სერტიფიცირება სავალდებულო ხდება. აღნიშნული ხელს შეუწყობს საერთაშორისო სტანდარტებთან დაახლოებული ვეტერინარული მომსახურების განვითარებას.ღონისძიებას აღმასრულებელი და საკანონმდებლო ხელისუფლების, დარგობრივი ასოციაციების წარმომადგენლები, ფერმერები და სტუდენტები ესწრებოდნენ. დამსახურებულ ვეტერინარებსა და სტუდენტებს სიმბოლური საჩუქრები გადაეცათ. გაიმართა დისკუსია პოტენციურ დამსაქმებლებსა და სტუდენტებს შორის. ვეტერინარიის მსოფლიო დღე 2000 წელს ვეტერინარიის მსოფლიო ასოციაციის (WVA) ინიციატივით დაწესდა და ყოველწლიურად აპრილის ბოლო შაბათს აღინიშნება. ამ დღის აღნიშვნის მიზანია, ხელი შეუწყოს პროფესიის პოპულარიზაციას, ხაზი გაუსვას ვეტერინარების წვლილს საზოგადოებრივ ჯანდაცვაში და გაზარდოს ცნობიერება ვეტერინართა საქმიანობის შესახებ.
იხილეთ სრულად
